शहीद दशरथ पुस्तकालयको ४६ औँ वार्षिकोत्सव तथा राष्ट्रिय शहीद दिवस 

हरिश्चन्द्र बाग, कञ्चनपुर, १६ माघ ।कञ्चनपुरको बेलौरीमा रहेको श्री शहीद दशरथ पुस्तकालयको ४६ औँ वार्षिकोत्सव तथा राष्ट्रिय शहीद दिवस विविध कार्यक्रमका साथ मनाइएको छ । “सबल समाजको आधार, पुस्तकालयको विकास” भन्ने मूल नाराका साथ आयोजित कार्यक्रममा सुदूरपश्चिम प्रदेश सभा सदस्य दिवानसिंह बिष्ट लगायतका गन्यमान्य व्यक्तिहरूले शहीदहरूको तस्बिरमा माल्यार्पण गरी श्रद्धा सुमन व्यक्त गर्नुभएको छ ।पुस्तकालय व्यवस्थापन समितिका अध्यक्ष मधु विलास ढुङ्गानाका अनुसार कार्यक्रममा शहीदप्रति सम्मान प्रकट गर्दै पुस्तकालयको भूमिका र समाजमा यसको महत्वबारे समेत चर्चा गरिएको थियो । कार्यक्रममा अमर शहीद दशरथ चन्दको स्मृतिमा वि.सं. २०३६ सालमा पुस्तकालय स्थापना गरिएको संस्थापक सदस्य हर्क सिंह कुँवरले जानकारी दिनुभयो । उहाँका अनुसार पुस्तकालयले विगत ४६ वर्षदेखि बेलौरी क्षेत्रका विद्यार्थी, शिक्षक तथा सर्वसाधारणलाई ज्ञान, सूचना र अध्ययनको अवसर प्रदान गर्दै आएको छ ।