पालिकाहरू मुकदर्शक हुँदा दुई करोड लगानीमा स्थापना भएको बी.पी.एल. अक्सिजन प्लान्ट डेढ वर्षदेखि बन्द

माधव पौडेल, कञ्चनपुर, ०७ वैशाख । कञ्चनपुरको बेलौरी नगरपालिकामा सञ्चालनमा ल्याइएको बी.पी.एल. अक्सिजन प्लान्ट विगत करिब डेढ वर्षदेखि बन्द अवस्थामा रहेको छ । श्रीपुर स्वास्थ्य केन्द्रमा स्थापना गरिएको उक्त प्लान्ट २०७९ असोज १४ गतेदेखि सञ्चालनमा आएको थियो भने २०८० सालको पौष महिनादेखि सञ्चालन बन्द भएको हो ।बेलौरी नगरपालिका, पुनर्वास नगरपालिका र लालझाडी गाउँपालिकाको संयुक्त लगानीमा स्थापना गरिएको उक्त प्लान्ट करिब २ करोड रुपैयाँको लागतमा निर्माण गरिएको थियोे । जसमा बेलौरी नगरपालिकाले १ करोड, पुनर्वास नगरपालिकाले ६५ लाख र लालझाडी गाउँपालिकाले ३५ लाख रुपैयाँ लगानी गरेका थिए।प्लान्ट सञ्चालनमा आएको एक वर्ष तीन महिनामै प्राविधिक कारणले बिग्रिएपछि बन्द भएको हो । तर प्लान्ट किन बन्द भयो र अहिलेसम्म पुनः सञ्चालनमा किन ल्याउन सकिएन भन्ने विषयमा साझेदारी तीनै पालिकाहरूले स्पष्ट जवाफ दिन सकेका छैनन् ।

कञ्चनपुरको दक्षिणी क्षेत्रका नागरिकका लागि आपतकालीन अवस्थामा अक्सिजनको सहज पहुँच सुनिश्चित गर्ने उद्देश्यले स्थापना गरिएको प्लान्ट बन्द हुँदा अहिले पनि कैलालीको धनगढीबाट अक्सिजन झिकेर उपचार गर्नुपर्ने बाध्यता यथावत् छ । स्थानीयवासीहरू पालिकाहरूको उदासीनता र बेवास्ताप्रति आक्रोशित छन् । उनीहरू भन्छन्, “जनताको करबाट निर्माण भएको प्लान्ट लामो समयसम्म बन्द रहनु दुर्भाग्यपूर्ण मात्र होइन, जनस्वास्थ्यप्रति गरिएको गम्भीर लापरबाही हो ।”