सामुदायिक वन समन्वय समिति मसुरियाको अध्यक्षमा पुनः सापकोटा चयन 

धनश्याम पौडेल,०८असोज, मसुरिया,सामुदायिक वन समन्वय समिति गौरीगंगा नगरपालिका मसुरियाको अध्यक्षमा पुनः ओमप्रकाश सापकोटा चयन भएका छन् ‌ । सोमबार भएको १७ औं बार्षिक साधारणसभाले सापकोटाको नेतृत्वमा १३ सदस्यिय कार्यसमितीको निर्वाचन गरेको हो । समितिको उपाध्यक्ष, सचिव कोषाध्यक्ष र सहसचिवमा क्रमशः विष्णुमाया जोशी, नविनकुमार बोहरा, प्रेमकुमारी चौधरी र बुधराम डगौरा थारु तथा सदस्यहरुमा मस राम चौधरी,रुपा चौधरी, मोहन बहादुर कामी, दिपकराज जोशी, बसन्ती कुमारी नाथ, नारायण प्रसाद शर्मा, मान बहादुर थारु र अंग बहादुर कडायत चयन भएका छन् ।

समितिका अध्यक्ष ओमप्रकाश सापकोटाको सभापतित्वमा भएको १७ औं बार्षिक साधारणसभा तथा सार्वजनिक सुनुवाई कार्यक्रममा डिभिजन वन कार्यालय धनगढीका प्रमुख रामचन्द्र कडेल प्रमुख अतिथि रहनु भएको थियो।सभामा कार्यालय सचिव भिम प्रसाद सापकोटाले बार्षिक प्रगति प्रतिवेदन तथा आर्थिक वर्ष २०८१/०८२ को लागि १ करोड ९० लाख ६२ हजार रुपैया बराबरको प्रस्ताव प्रस्तुत गरेका थिए,भने समितिका सदस्य नारायण शर्माले आर्थिक वर्ष २०८०/८१ को ५६ लाख ७८ हजार ५ सय रुपैयाँको आयव्यय विवरण प्रस्तुत गरेका थिए । सभाको सञ्चालन सचिव नविनकुमार बोहराले गरेका थिए । सामुदायिक वन समन्वय समिति मसुरियामा ३७ वटा सामुदायिक वन उपभोक्ता समूह आबद्ध रहेका छन् ।