जनताका समस्याप्रति बेलौरी नगरलाई छैन चासो : स्थानीय मदनसिंह नगारीद्वारा व्यक्तिगत खर्चमा बाटो मर्मत 

कञ्चनपुर, २४ साउन । कञ्चनपुरको बेलौरी नगरपालिका वडा नम्बर ७ र ८ मा पर्ने बरैया स्थित सडकमा खाल्डाखुल्डी परेर असहज भएपछि स्थानीयले मर्मत गरिदिन पटकपटक स्थानीय तहलाई अनुरोध गरे । तर स्थानीय तहले बाटो मर्मत गर्न अटेरी गरेपछि आज बिहीबार स्थानीय मदन सिंह नगारीले आफ्नो व्यक्तिगत खर्चमा सडकका खाल्डाखुल्डीमा माटो भरेर मर्मत गरेका छन् ।वर्षात् सुरु भएसँगै बिग्रिएको सडक मर्मतका लागि वडा र नगरपालिका कार्यालयलाई पटक पटक आग्रह गर्दा समेत अटेरी गरेपछि आफ्नै व्यक्तिगत खर्चमा भएपनि माटो पटान गरी बाटो मर्मत गरेको स्थानीय मदन सिंह नगारीले बताउनु भयो । “हाम्रो माग सम्बोधनमा बेलौरी नगरपालिका मुखदर्शक बन्यो” नगारीले भन्नुभयो, “पटकपटक अनुरोध गर्दा समेत कुनै चासो नदेखाएपछि आफ्नै खर्चमा भएपनि बाटो मर्मत गरियो ।” स्थानीय तहको निर्वाचनको बेला उम्मेदवारहरूले सडक, स्वास्थ्य, शिक्षालाई प्रभावकारी बनाउने आश्वासन दिएपनि जितिसकेपछि आफूले दिएको आश्वासनकै बेवास्ता गरेको समेत नगारीको दुखेसो छ ।