लागू औषध खैरो हेरोइन सहित पुनर्वास नगरपालिकाका कर्मचारी समेत गरी दुई पक्राउ

पुनर्वास, कञ्चनपुर, २९ असार । कञ्चनपुरको पुनर्वासबाट लागू औषध सहित नगरपालिकाका कर्मचारी समेत गरी दुई पक्राउ परेका छन् । पुनर्वास नगरपालिकामा कार्यरत कर्मचारी पुनर्वास ५ मदनटोल बस्ने २८ वर्षीय कृष्ण प्रसाद बडू र पुनर्वास ४ घ गाउँ बस्ने २८ वर्षीय असीम थापालाई शुक्रबार दिउँसो पुनर्वास ६ ङ गाउँ स्थित नयाँ निर्माणाधीन घरबाट प्रहरीले पक्राउ गरेको हो । उनीहरूको साथबाट प्रतिबन्धित लागू औषध खैरो हेरोइन बरामद गरिएको इलाका प्रहरी कार्यालय त्रिभुवनबस्तीका प्रहरी निरीक्षक नरेश राज मल्लले जानकारी दिनुभयो । पक्राउ परेका मध्येका बडू यसअघि पुनर्वास नगरपालिका वडा नम्बर १० का वडा सचिव थिए । दुई हप्ताअघि उनको ठाउँमा नगरपालिकाले नयाँ वडा सचिव पठाएपछि उनी केही दिन मात्रै वडामा हाजिर भएको र पछिल्लो केही दिनयता उनी वडामा हाजिर नभएको वडा अध्यक्ष शुकदेव रानाले बताउनु भएको छ ।