बेलौरी नगरपालिका ८ स्थित नेपाल–भारत सीमा क्षेत्रमा बाघ देखिएकाले सचेत रहन वन कार्यालयको आग्रह

बेलौरी,१७ बैशाख । कञ्चनपुरको बेलौरी नगरपालिका वडा नम्बर ८ स्थित पचुईसँग सीमा जोडिएको भारतीय गाउँ राघापुरीमा फेरी बाघ देखिन थालेको छ । आईतबार सीमा स्तम्भ नम्बर ३८ नजिकै पचुईसँग सीमा जोडिएको भारतीय गाउँ राघापुरीमा फेरी बाघ देखिएको हो । सो सिमा क्षेत्रमा बाघ देखिए पछि दुबै देशका स्थानीयबासिन्दामा त्रास फैलिएको छ । पचुई बस्ने ३५ वर्षीया मिच्चु राना आइतबार दिउँसो ३८ नम्बर स्तम्भ नजिक घाँस काटन गएको समयमा बाघ गर्जेको आवाज सुनेको बताएकी छन । उनी भाग्दै भारतीय गाउँ टिल्ला नम्बर ४ को सीमा सुरक्षा बल (एसएसबी) को बीओपी मातहतको फरवार्ड पोष्ट पुगेकी थिइन् । एसएसबीले महिलाले भनेको ठाउँमा बाघ देखिएको हुदा सतर्क रहन नेपाली प्रशासनलाई पनि अनुरोध गरेको छ । बाघ देखिएको ठाउँमा भारतीय बन टोली, त्यहाँको प्रहरी, एसएसबी लगायत स्थानीयहरुले खोजि गरिरहेको छ ।

बेलौरी नगरपालिका वडा नम्बर ८ का अध्यक्ष बिषराम रानाका अनुसार उक्त बाघ नेपाल भारत सिमा क्षेत्र नजिक देखिएकाले नेपालतर्फ आउन सक्ने सम्भावना रहेकाले नेपाल प्रहरी, सशस्त्र प्रहरीसँगै जनप्रतिनिधि र स्थानीयको समन्वयमा सुरक्षा सतर्कता बढाइएको बताउनुभयो । यस्तै कुण्डा सव डिभिजन बन कार्यालय पचकडियाका प्रमुख दिनेश कुमार यादवले बेलौरी नगरपालिका वडा नम्बर ८ स्थित पिलर नम्बर ३८ को अन्दाजी ५०० मिटर दक्षिणतर्फ भारतीय भु–भागमा बाघ, चितुवा,चितल देखिएको र सुनिएकोले सबैमा सचेत रहन आग्रह गर्नुका साथै हल्ला, डर र त्रास तुरुन्तै फैलिने सम्भावना रहेकोले सत्थ्य तत्थ्य बुझेर मात्र सुचना सम्प्रेषण गर्न सबैमा अनुरोध गर्नु भएको छ । यस्तै केही दिन अघि पचुईकी ४२ वर्षीया गंगादेवी चन्द खप्टीनाला क्षेत्रमा घास काटन गएको बेला बाघले आक्रमण गरी उनको ज्यान लिएको थियो । बर्दिया राष्ट्रिय निकुञ्ज र शुक्लाफाटा राष्ट्रिय निकुञ्जको सयुक्त टोलिले उक्त बाघ लाई नियन्त्रणमा लिएको थियो।